Չարբախի ոստիկանները հետախուզվողների են հայտնաբերել

Ոստիկանության Չարբախի բաժանմունքի ծառայողները, իրացնելով ստացված տեղեկությունները և ձեռնարկելով օպերատիվ-հետախուզական միջոցառումներ, հետախուզվողների են հայտնաբերել: Հոկտեմբերի 20-ի ժամը 21.00-ին նրանք Ներքին Չարբախի 1-ին փողոցում հայտնաբերել, ձերբակալել և բաժանմունք են տեղափոխել 55-ամյա Մայ Ա.-ին, որը Մարոկկոյի Թագավորության իրավապահների կողմից հետախուզվում էր խարդախության մեղադրանքով: Խափանման միջոցը՝ կալանք:
Հոկտեմբերի 21-ի ժամը 15.00-ին Չարբախի ոստիկանները Նալբանդյան փողոցի շենքերից մեկում հայտնաբերել, ձերբակալել և բաժանմունք են տեղափոխել 37-ամյա Արսեն Մ.-ին: Նա հուլիսի 6-ից ոստիկանության Արմավիրի բաժնի կողմից հետախուզվում էր ՀՀ քրեական օրենսգրքի 344-րդ (Տրանսպորտային միջոցներ վարելու իրավունքից զրկված կամ այդ իրավունքը կասեցված անձի կողմից տրանսպորտային միջոցներ վարելը կամ այդ անձի կամ տրանսպորտային միջոցներ վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ սթափության վիճակի զննություն անցնելուց հրաժարվելը կամ խուսափելը), 255-րդ (Խարդախությունը) և ՀՀ նախկին քրեական օրենսգրքի 177-րդ (Գողությունը) հոդվածների մեղադրանքով:
Խափանման միջոցը՝ կալանք: