Ձերբակալվեցին տերմինալից գողությունը կատարելուց հետո

Քրեական ոստիկանության գլխավոր վարչության ծառայողները ստացել էին օպերատիվ տվյալ, որ մի խումբ Նոր Նորքում պատրաստվում է գողություն կատարել: Տվյալն իրացվեց Նոր Նորքի քրեական հետախույզների ու մայրաքաղաքի պարեկների, նաև «Թելսել» ընկերության անվտանգության ծառայողների հետ համատեղ: Հոկտեմբերի 3-ին, առավոտյան ժամը 6-ին, Մյասնիկյան պողոտայում իրավապահները ձերբակալեցին և բաժին տեղափոխեցին երեք տղամարդու`«ԲՄՎ» մակնիշի մեքենայով հանդերձ:
Ձերբակալվելուց 20 րոպե առաջ, Գայի պողոտայում, տեխնիկական միջոցների գործադրմամբ, նրանք կոտրել էին մի տերմինալ և գողացել դրամապահոցը:
Բաժնում կատարված անձնական խուզարկությամբ 31-ամյա տղամարդու ձեռքի պայուսակում հայտնաբերվել են` 23 հատ 20, 6-ական 10 ու հինգ, մեկ հատ երկու հազար դրամանոցներ և 55 հատ հազարանոց, ընդհանուր` 607 հազար դրամ: «ԲՄՎ-ի» 40-ամյա վարորդ էլ հայտնել է, որ գողացված դրամապահոցը գտնվում է մեքենայում:
Տղամարդիկ և կազմված փաստաթղթերը ներկայացվել են քննչական բաժին:
Նախաքննությամբ հանգամանքները պարզվում են: