Ապօրինի ծառահատման դեպքեր են բացահայտվել

Դեկտեմբերի 9-ին Գորիսի բաժնի համայնքային ոստիկանության բաժանմունքում տեղեկություններ էին ստացվել, որ Հարթաշեն գյուղի մի բնակիչ ապօրինի հատել է ուռենի և ընկուզենիներ։ Տղամարդը հրավիրվել է ոստիկանության բաժին և հայտնել, որ հոկտեմբերին գյուղի վարչական տարածքում ապօրինի հատել է 2 ընկուզենի, 1 ուռենի և ստացված մոտ 10 խմ փայտանյութը պարտքի դիմաց տվել է համագյուղացուն։
Դեկտեմբերի 10-ին Կապանի բաժնի համայնքային ոստիկանները «Արծվանիկի անտառպետության» տարածքում ապօրինի ծառահատում կատարելու վերաբերյալ տեղեկություններ էին ստացել, որն իրացրին ԱԱԾ սահմանապահ զորքերի ծառայողների հետ։ Շրջայցի ընթացքում իրավապահները Կարմրաքար բնակավայրի տարածքում ստուգման նպատակով կանգնեցրել են մոտ 3 խմ փայտանյութով և բենզասղոցներով բարձված բեռնատար։ Վարորդը փայտանյութի օրինականության վերաբերյալ համապատասխան փաստաթուղթ չուներ։ Նրա հայտնածով՝ անտառից հատել էր բոխի։
Երկու դեպքով էլ նախաձեռնվել է քրեական վարույթ։ Հանգամանքները նախաքննությամբ պարզվում են։